Cari ilin fevralın 15-də Bakıdakı Rusiya İnformasiya-Mədəniyyət Mərkəzində Böyük qələbənin 65 illiyinə həsr olunmuş tədbirlər çərçivəsində görkəmli sovet şairi, Böyük Vətən müharibəsi illərində yazılmış şeirlər silsiləsi - «Moabit dəftəri»nin müəllifi Musa Cəlilin xatirə gecəsi keçirilib.
Tədbir Rusiyanın Azərbaycandakı Səfirliyinin dəstəyi ilə, Azərbaycanın Rusiyalı Həmvətənlərinin Əlaqələndirmə Şurasının yeni seçilmiş sədri G.K.Myasoutovanın rəhbərlik etdiyi «Tuqan tel» Respublika Tatar Mədəniyyəti Cəmiyyəti ilə birlikdə təşkil olunub.
Məlum olduğu kimi müharibədən əvvəl M.Cəlil Kazan şəhərində yaşayıb və burada Tatarıstan Yazıçılar İttifaqına rəhbərlik edib. Müharibənin ilk günlərindən şair könüllü olaraq cəbhəyə yola düşüb və baş komissar rütbəsində döyüşüb.
Alman faşistlərinə qarşı mübarizədə göstərdiyi müstəsna mərdlik və cəsarətinə görə, ölümündən sonra Sovet İttifaqı Qəhrəmanı fəxri adına, «Moabit dəftəri» şeirlər silsiləsinə görə isə Lenin mükafatına layiq görülüb.
Tədbir əsnasında Bakı Slavyan Universitetinin mütəxəssisləri şairin ədəbi irsindən söz açıblar, «Tuqan tel»in gənc fəalları isə M.Cəlilin tatar, rus və Azərbaycan dillərində şeirlərini söyləyiblər.
Xatirə gecəsində Həmvətənlərin Əlaqələndirmə Şurasının üzvləri, həmvətən təşkilatları, ictimaiyyət və mətbuat nümayəndələri iştirak ediblər. Tədbir haqqında reportaj «Lider» telekanalı vasitəsilə yayımlanıb.
